رمضان هو شهر "اللمة" سواء مع العيلة أو الأصحاب، في الإسكندرية التجمع مش بيكون وقت الفطار بس، ده كمان بيكون وقت السحور ويمكن أغلب العائلات أو الأصحاب اتجهوا خلال السنوات الأخيرة لاختيار أماكن مفتوحة يتجمعوا ويتسحروا فيها، لأن الإحساس برمضان وأجوائه دايمًا بيكون أحلى وسط التجمعات اللي أحيانًا ممكن تبقى مع ناس متعرفهمش لكن بتحسهم عيلتك الكبيرة اللي بتختم معاهم ليلة رمضانية قبل ما تستقبل يوم صيام جديد، ليلة حلوة يرن فيها صوت الضحك وتكتر فيها الحكاوي.

"مصر الناس"، عملت جولة عشان تعرفكم على أكتر أماكن السحور المفضلة عند الإسكندرانية، اللي ممكن يقفلوا شوارع بالكامل عشان يتسحروا من غير ما يحسبوا أن ده غلط لآن همهم بيكون يضموا ناس أكتر ليهم تظهر بيهم ومعاهم فرحة شهر رمضان حتى ولو كان مكان التجمع ميجيش كام متر على بعضه!

ألبان سويسرا..

على الرغم من مساحته الصغيرة إلا أنه من أحب أماكن السحور عند الإسكندرانية، لأن له بصمته الخاصة بخلطة الجبن اللي بيزودها على كل الأصناف اللي بيقدمها.

في "ألبان سويسرا" تلاقي بطاطس بالجبنة، بيض بالبسطرمة بالجبنة، جمبري بالجبنة، بانيه بالجبنة، سوسيس بالجبنة، كله عند ألبان سويسرا بالجبنة لأنه ملك الجبنة.

ولو هنتكلم عن الحلو يبقى لازم نتكلم عن طبق القشطة بالعسل بالحلاوة والنوتيلا، لو أنت مش اسكندراني لازم تيجي وتجرب.

وألبان سويسرا في الأصل عبارة عن "بقالة" صغيرة موجودة بمنطقة كامب شيزار التابعة لحي وسط واشتهرت لما صحابها قرروا يعملوا "بيزنس" صغير وحولوا جزء من البقالة لمطعم صغير واعتمدوا في الأصناف اللي بيقدموها على منتجات بيبعوها في البقالة.

ألبان سيف..

أما لو عايزين سهرة رمضانية في بحري يبقى عليكم وعلى ألبان سيف الموجود تحديدًا في حي الجمرك الشعبي، الحي اللي تشم فيه ريحة الصيادين وتاريخ صناعة السفن وجدعنة ولاد البلد.

الشارع السكندري يتناول سحوره عند ألبان سيف

القاعدة هناك تحسس الواحد بالجو الرمضاني بتاع زمان اللي كلنا بقينا بنفتقده، سحور خفيف وسط صحابك وعيلتك عند ألبان سيف مع استمتاعك بهوا البحر وريحة اليود وتقوم تنهي سحورك بكوباية شاي من عند قهوة فاروق، ساعتها هتحس بجو شهر رمضان على أصوله.