«Winji».. أول مطعم وكافيه نوبي في الإسكندرية

من إسكندرية ونفسك تقضي يوم في النوبة، وتلاقي نفسك عايش أجوائها، تأكل "جاكوت" و"كوبي" و"تركين"، أو تشرب «إبريه» و«قونقليز»، تغني بالنوبي وتشوف عروض نوبية أو ترسم بالحنة النوبية الأصلية.

"مصر الناس" اختارت لك المكان اللي تقضي فيه يوم وكأنك في النوبة بأقصى جنوب مصر .

بيت من بيوت النوبة

بوابة دخول مطعم winji

وراء "الداون تاون مول " على طريق إسكندرية القاهرة الصحراوي، بجوار نادي اللاجون، في مول ميراج ، وسط مطاعم بتقدم منيو إيطالي وفرنسي وشرقي، هتلاقي مطعم وكافيه نوبي اسمه "WiNji Cafe & Restaurant"، ديكورالمكان والرسومات الملونة والبراويز النوبية اللى على الجدران، هتشدك وهتحس إنك داخل بيت من بيوت النوبة الجميلة والبسيطة والمبهجة، بدايةً من باب المطعم والرسومات المنقوشة عليه والكلمات النوبية المرسومة على الجدران.

بوابة حمام السباحة مطعم winji

النجمة العالية

بالرغم من كل الألوان المبهجة حواليك في المكان، إلا إن كراسي المكان غلب عليها اللون الأبيض عشان تبين جمال المساند المنقوشة بألوان زاهية عليها، وكمان ترابيزات المكان محفور عليها إسم winji واللى معناه بالنوبي النجمه العالية، ممكن تختار تقعد جوة المطعم، أو لو بتفضل المكان المفتوح ممكن تقعد على حمام السباحة والنافورة المضيئة وسط أشجار الزينة على حسب إختيارك.

لوجو المطعم النوبى

الألوان المبهجة حواليك في المكان

مش منيو نوبي وبس

يمكن مش كل الناس تحب تجرب الأكل والمشروب النوبي لكن ناس كتير أكدت سعادتها بالتجربة دي، وإدارة المكان وفرتلك منيو فيه شرح لمكونات الوجبات عشان تسهل عليك الإختيار.

يعني هتلاقي من الوجبات المميزة "التركين" وهي عبارة عن خليط من السمك المجفف مخلوط بالبهارات النوبية الشهية وشرائح البصل، ونفس الوصف التفصيلي هتلاقيه في المشروبات والحلويات النوبية .

ولو حابب تستمتع بالجو النوبي بس مش عايز تجرب الأكل النوبي، ممكن تختار بين المنيو الفرنسي والإيطالي والمشروبات الفريش اللى بيوفرها المكان ليك.

منيو مطعم winji

صور مجانية

وطبعًا هتستمتع بالشو والغناء النوبي اللي بتقدمة فرق نوبية، ومش بس كدة كمان تقدرتجرب الملابس النوبية وتتصور بيها صورمجانية مع مصور محترف، بعد ماترسم الحنة اللي هتختارها من كتالوج مع الحنانة النوبية بأسعار رمزية بتتراوح من 10 ل 15 جنيه، واللي هتتعلم منها كلمات وجمل نوبية زي"كوريجو آي نالويه" يعني كل سنة وأنت طيب وكلمات تانية كتير.