بقلم- مارينا مكاري
حبل طويل ملفوف
حبل مسميينه الظروف
حبل خانقها
حبل مش هامه حتى لو كان قاتلها
حبل حاول يحسسها بالأمان
بس حبسها ورا الببان
حبل اتعقد عقده قوية
ماتتفكش بمحاولة عادية
حبل رابط عقل واحدة فكرت برة الصندوق
حبل قيد كل واحدة حبت م الممنوع تدوق
حبل مسك إيدها لما كتبت كلمة اعتراض
حبل وقفها تتحاسب عشان انتقدت ظلم زاد
حبل مانعها تلبس، تخرج، يعني مانعها تعيش
حبل كاتم صوتها جوة لحد ما قرب يبقى مفيش
حبل مانع أي خطوة هتخطيها ل قدام
حبل ماسك خطاوي رجليها زي ما يكون بالزمام
حبل واجعها
حبل حتى الضحكة مانعها
حبل قيد روحها اللي حلمت في يوم تطير
حبل دمر كل طموحها عشان ف م مجتمع معندوش ضمير
